Ի՞նչ ակնկալենք ժնեւյան հանդիպումից.
Երկու կարծիք
Մագիստրատուրայի առաջին կուրսի ուսանողուհիների այս երկու նյութերն արդեն պատրաստ էին, երբ տեղեկություն ստացվեց, որ Հայաստանի եւ Ադրբեջանի արտգործնախարարների ժնեւյան հանդիպումը մեկ օրով հետաձգվում է եւ կկայանա հոկտեմբերի 30-ին:
Լսենք քաղաքագետի եւ ամենօրյա իրադարձություններին հետեւող, իրազեկ սովորական քաղաքացու կարծիքները:
«Հակամարտության դադարեցումը ձեռնտու չէ նախևառաջ Թուրքիային»
Լիաննա ՀԱԿՈԲՅԱՆ
Հայաստանի և Ադրբեջանի արտգործնախարարները համաձայնել են ԵԱՀԿ Մինսկի խմբի համանախագահների միջնորդությամբ հանդիպել Ժնևում՝ քննարկելու բոլոր հնարավոր քայլերը, որպեսզի հասնեն արցախա-ադրբեջանական հակամարտության խաղաղ կարգավորմանը:
Ի՞նչ կարելի է ակնկալել այդ հանդիպումից:
Մեր խնդրանքով պարզաբանում է քաղաքագետ Ցոլակ Ակոպյանը.
«Անկեղծ ասած մեծ սպասելիքներ չունեմ: Արդեն իսկ ակնհայտ է, որ հակամարտության դադարեցումը ձեռնտու չէ Թուրքիային: Ադրբեջանն այս պահին, նույնիսկ ցանկության դեպքում չի կարող դադարեցնել կրակը» ,- ասաց պարոն Ակոպյանը:
Հիշեցնենք, որ Ադրբեջանն արդեն երրորդ անգամ խախտում է կրակի դադարեցման վերաբերյալ ձեռք բերված համաձայնությունները և չի պահպանում հումանիտար հրադադարը:
«Անկախ ամեն ինչից՝ մենք պետք է շարունակենք դիվանագիտական ուղիներ փնտրել: ԵԱՀԿ Մինսկի խմբին պետք է փորձենք հասկացնել, որ արցախահայության փրկությունը պայմանավորված է միայն Արցախի ինքնորոշման իրավունքի ճանաչմամբ»,- ավելացրեց քաղաքագետը:
***
«Խնդիրը ևս մեկ անգամ միջազգային հարթակներում բարձրացնելը մեզ չի վնասի»
Լիլիթ ՀԱՐՈՒԹՅՈՒՆՅԱՆ
«Գելի գլխին Ավետարան են կարդում, ասում է` շուտ արա, ոչխարը սարն անցավ։ Ի՞նչ տարբերություն, թե որերորդ անգամ հրադադար կհաստատեն, միևնույն է` Ադրբեջանը չի պահպանելու այն», — մեզ հետ զրույցում ասաց Երևանի բնակիչ Գևորգ Խաչատրյանը` խոսելով արտգործնախարարների և ԵԱՀԿ Մինսկի խմբի համանախագահների` Ժնևում կայանալիք հանդիպման մասին:
Պարոն Խաչատրյանը շեշտեց, որ բոլոր շահագրգիռ երկրներն էլ տեղյակ են իրավիճակից, սակայն որևէ քայլ չեն ձեռնարկում` ելնելով սեփական շահերից: Փորձը ցույց է տվել, որ ավելի լավ է բոլոր հույսերը կապել բանակի հետ:
«Չեմ կարծում, թե այդ հանդիպումը որևէ էական փոփոխություն կմտցնի Ադրբեջանի վարքագծի մեջ: ԵԱՀԿ Մինսկի խմբի համանախագահներն արդեն փորձել են մարդասիրական հրադադար հաստատել, բայց իրավիճակը կարծես թե չի փոխվել: Այնուամենյանիվ, այս խնդիրը ևս մեկ անգամ միջազգային հարթակներում բարձրացնելը մեզ չի վնասի, միգուցե նույնիսկ որևէ դրական ազդեցություն ունենա իրավիճակի վրա», — նշեց պարոն Խաչատրյանը:
usanoghakantert 